“නොදුටු ඇස්” අද යළි වේදිකාවට



Instagrame
Youtubejhj-New
Facebook
Twitter

කංචුකා ධර්මසිරි අධ්‍යක්ෂණය කළ “නොදුටු ඇස්” පර්යේෂණාත්මක වේදිකා නාට්‍යය සැප්තැම්බරයේ යළි වේදිකාගත කිරීමට කටයුතු සුදානම් කොට තිබේ.

ඒ අනුව අද රාත්‍රී 7 ට පේරාදෙණිය WUS රංග පීඨයේදීත් 21 වැනිදා සවස 3.30ට සහ 6.45ට බොරැල්ල නාමෙල් මාලිනී පුංචි තියටර් හිදීත් එය වේදිකා ගත කිරීමට නියමිත ය.

කුමාරි කුමාරගමගේගේ නොඇසූ කන්වලට කෘතියෙහි එන පද්‍ය සහ බර්ටෝල්ට් බ්‍රෙෂ්ට් යුද්ධය, ප්‍රචණ්ඩත්වය හා බලය පිළිබඳ ලියූ පද්‍ය නොදුටු ඇස් නාට්‍යයට පාදක වී ඇත.

කුමාරි කුමාරගමගේගේ පද්‍ය ශ්‍රී ලංකාවේ තිස් අවුරුදු යුද්ධයේ බලපෑමට ලක් වූ ස්ත්‍රීන්, දරුවන් හා මිනිසුන්ගේ දෛනික ජීවිතය ග්‍රහණය කරගනී; ගැටුම්කාරී සන්දර්භයක් තුළ ජීවිතයේ බිඳ විසිර යාම විදහා පාමින් එහි දී පන්ති භේදය හා ස්ත්‍රී-පුරුෂ සමාජභාවය ක්‍රියාත්මක වන අන්දම දෙස අවධානය යොමු කරයි.

යුද්ධයෙහි ආර්ථික හා දේශපාලනික යටිතලය ගවේෂණය කරන බ්‍රෙෂ්ට්, සාමාන්‍ය මිනිසුන් හා ගැහැණුන් එවැනි විනාශකාරී සන්තතීන්ගේ අවසන් ගොදුරු බවට පත් වන අයුරු පෙන්නුම් කරයි. නොදුටු ඇස්, බහුමාධ්‍ය රංගයක් උදෙසා කුමාරගමගේගේත් බ්‍රෙෂ්ට්ගේත් කවි ප්‍රතිනිර්මාණය කරයි. එහි දී යුද්ධයෙහි ප්‍රචණ්ඩත්වයේ මානුෂීය ප්‍රතිවිපාක ග්‍රහණය කරගැනීමත් ඒ පිළිබඳ විචාරාත්මක බැල්මක් හෙළීමත් සඳහා චලන, නිසලතාව, ශබ්ද හා නිශ්ශබ්දතාව උපයෝගී කරගනී. තව ද එය අප ජීවත් වන අවකාශ සමග අපට ඇති සම්බන්ධය ප්‍රශ්න කරන්නේ අවකාශය, මතකය, ශරීර හා ප්‍රචණ්ඩත්වය අතර සබඳතා විභාග කිරීම මඟිනි.

නොදුටු ඇස් පේරාදෙණිය විශ්ව විද්‍යාලයීය කලා මණ්ඩලයේ අනුග්‍රහයෙන් නිෂ්පාදිත ය. මෙම නාට්‍ය දර්ශනය ඉදිරිපත් කරනු ලබන්නේ පේරාදෙණිය විශ්ව විද්‍යාලයීය ඉංග්‍රීසි අධ්‍යයන අංශය සහ Theatre of Melting Clock විසිනි.