Befikre
දෙසැම්බර් මාසයේ තිරගත වූ බොලිවුඩ් චිත්‍රපට කිහිපය අතරින් ආදිත්‍ය චොප්රාගේ "Befikre" චිත්‍රපටය කෙරෙහි මේ වනවිට බොහෝ රසික පිරිසකගේ අවධානය යොමුව ඇති අතර, එය දෙසැම්බර් 09 වැනිදා බොලිවුඩයට සමගාමීව ලොවපුරා ප්‍රදර්ශනය ආරම්භ කරනු ලැබීය.
නළුනිළියන්
මෙහි ප්‍රධාන නළු චරිතය වන "ධරම්" ලෙස චරිත නිරූපණය කරනු ලබන්නේ ජනප්‍රිය බොලිවුඩ් සිනමා නළු රන්වීර්සිං විසිනි. ඔහුගේ පෙම්වතිය වන "ශයිරා" ලෙස වානි කපූර් චරිත නිරූපණය කරයි. ඔවුන්ට අමතරව එල්සා බැචර්, ජූලි බර්ඩන්, හිගෝ ගර්සියා, මිලා ලුන්සික්, සැන්ඩ්‍රා රෝසින්ස්කයි යන පිරිස සෙසු චරිත සඳහා එක්වෙති.
සෙසු සහයකයන්
චිත්‍රපටය නිෂ්පාදනය කොට අධ්‍යක්ෂණය කරනු ලබන්නේ ආදිත්‍ය චොප්රා විසිනි. "බේක්රේ" චිත්‍රපටයේ සංස්කරණ කටයුතු නම්රතා රාඕද, කැමරාකරණයෙන් කනමේ ඔනයෝමාද, දෙබස් සරත් කටාරියාද, ඇඳුම් නිර්මාණයෙන් නටාලි යුක්සිල්ද එක්ව සිටිති. මෙහි කතාව හා තිර රචනයද චිත්‍රපට අධ්‍යක්ෂක ආදිත්‍ය චොප්රා විසින් සිදු කර ඇත.
කතාව
පැරීසියේ ජීවත් වන "ධරම්" හා "ශයිරා" ඉන්දියානු ජාතිකයෝය. ඔවුහු පෙම්වතුන් වෙති. පැරිසියේ සංස්කෘතියට හැඩගැසෙන්නට උත්සාහ කරන ඔවුන් දෙදෙනා විවාහ වීමට පෙර සිටම සිය ජීවිතය එකට ගෙවාදමයි. ඉන්දීය සංස්කෘතියට පටහැනිව ක්‍රියා කරන ඔවුන් පසුව ගෙවාදමන මේ පැරිස් ජීවිතේ ගැන කනගාටුවට පත්වේ. නමුත්, මෙහි කතාව දර්ශනයෙන් දර්ශනය වෙනස් අර්ථකථන මතුවේ.
රූපගත කිරීම්
මෙහි සියලු රූපගත කිරීම් කටයුතු සිදු කොට ඇත්තේ ප්‍රංශයේ පැරිස් නගරයේදීය. මේ වසරේ මාර්තු මාසයේදී ආරම්භ කරනු ලැබූ මෙම චිත්‍රපටයේ රූපගත කිරීම් කටයුතු දින 50ක කාලයක් තුළ පැරිසියේදී සිදු කර තිබුණි. එමෙන්ම ඉන්දියාවේ මුම්බායි නගරයේදී මෙහි අවසන් දර්ශන කිහිපයක රූපගත කර තිබුණ බව සඳහන් වේ.
විශේෂත්වය
මෙහි ප්‍රධාන චරිත නිරූපණය කරන රන්වීර් සිං හා වානි කපූර් දෙදෙනා පළමු වතාවට බොලිවුඩ් චිත්‍රපටයක පෙම්වතුන් ලෙස දක්නට ලැබීම විශේෂත්වයකි. 2008 වසරේ තිරගත වූ "රබ් නේ බානා ඩී ජෝඩි" චිත්‍රපටයෙන් පසුව ආදිත්‍ය චොප්රා චිත්‍රපටයක් අධ්‍යක්ෂණය කරනු ලඉන චිත්‍රපටය මෙය වීම විශේෂත්වයකි. එමෙන්ම ඔහු විසින් මේ වසරේ නිෂ්පාදනය කළ තෙවැනි චිත්‍රපටයද මෙය වේ. රන්වීර් හා වානි මෙහි තොල්සිප ගැනීම දර්ශන 34කට පෙනී සිටින අතර, බොලිවුඩ් චිත්‍රපටයක එවැනි දර්ශන වැඩි ප්‍රමාණයක් ඇතුළත් පළමු චිත්‍රපටයද මෙය වෙයි.
නළුනිළියන් තෝරා ගැනීම
රන්වීර් සිං මෙම චිත්‍රපටයේ එන ප්‍රධාන නළු චරිතයට තෝරා ගත්තද, මෙහි ප්‍රධාන නිළි චරිතයට නිළියන් කිහිප දෙනෙකුගේ නම් යෝජනා වී තිබුණි. මුලින්ම මෙම චරිතයට සම්බන්ධ කරගෙන තිබුණේ ක්‍රිති ෂැනොන්ය. ඇය %රබ්තා^ චිත්‍රපටය වෙනුවෙන් කාර්ය බහුල වී තිබීම නිසාවෙන් පසුව ආලියාට මෙම චිත්‍රපටයේ චරිතය ලැබුණි. ඇය %ඩියර් සින්දගී^ චිත්‍රපටයේ රූපගත කිරීම්වලට සම්බන්ධ වීමත් සමග මෙම චිත්‍රපටය සඳහා දින වෙන්කරන්නට ඇයට නොහැකි විය. පසුව රන්වීර් සමග මෙහි ප්‍රධාන නිළි චරිතයට වානි කපූර් සම්බන්ධ කර ගෙන තිබුණි.
සංගීතය
මෙහි සංගීතය නිර්මාණය කොට ඇත්තේ විශාල් හා ශේකර් දෙදෙනාය. පසුබිම් ගීත ගායනයෙන් අර්ජිත් සිං, බෙනී දයාල්, නිකිල් ඩී සූසා, හර්ෂ්දිප් කෞර්, යෝ යෝ හනි සිං හා තුල්සි කුමාර් දායක වෙති. මේ වනවිට බොලිවුඩ් චිත්‍රපට ගීත දර්ශකයන්හි මුල් ගීත දහය අතරට පැමිණීමට "යූ ඇන්ඩ් මී" ගීතය ඇතුළත්ව තිබීම විශේෂත්වයකි.
නිෂ්පාදනය
මෙම චිත්‍රපටයේ සියලු නිෂ්පාදන කටයුතු සිදු කර ඇත්තේ චිත්‍රපට අධ්‍යක්ෂක ආදිත්‍ය චොප්රා විසිනි. එමෙන්ම මෙම චිත්‍රපටයේ සියලු බෙදාහැරීම් කටයුතු ආදිත්‍ය චොප්රාට අයත් "යශ්රාජ්" චිත්‍රපට සමාගම විසින් සිදු කර තිබේ. වාර්තා වන අන්දමට මෙම චිත්‍රපටය සඳහා වියදම් වූ මුදල ඉන්දියානු රුපියල් කෝටි 54කි.
තිරගත කිරීම්
විනාඩි 132ක් පුරා විකාශය වන මෙම චිත්‍රපටය තිරගත වීමට නියමිතව ඇත්තේ දෙසැම්බර් 09 වැනිදාය. ඉන්දියාවේ සිනමා ශාලා 759ක් තුළදී හා විදෙස් රටවල් කිහිපයක සිනමා ශාලා 376කදී මෙම චිත්‍රපටය තිරගත කිරීමට මේ වනවිට සැලසුම් කොට ඇත. සිනමා විචාරකයන් පවසන්නේ මෙම චිත්‍රපටය තිරගත වන කාලයේදී කිසිදු බොලිවුඩ් චිත්‍රපටයක් තිරගත නොවීම චිත්‍රපටයේ සාර්ථකත්වයට වාසියක් බවය.
