ක්ලැරන්ස් ඉතුරු කර තේජා නික්ම ගොස් දෙවසරක් ගෙවී ගිහින්

වත්මන් බයෝපික් සිනමා ප්රවණතාවයේ පුරෝගාමියා ; තේජා ඉද්දමල්ගොඩගේ අපෙන් සමුගෙන දෙවසරක් ගෙවී ගියේය .
තේජාගේ ගමන් මඟ ගැන දයාබරත්වයේ මතක අකුරු වී තිබුණේ මෙලෙසින් ය.
ශ්රී ලාංකේය සිනමාව තුළ මේ වන විට වර්ධනය වෙමින් පවතින චරිතාපදාන චිත්රපට (Biographical Films / Biopics) නිර්මාණය කිරීමේ ප්රවණතාවට පුරෝගාමී අඩිතාලමක් දැමූ චිත්රපට අධ්යක්ෂ තේජා ඉද්දමල්ගොඩ මහතා අභාවප්රාප්ත වී අදට දෙවසරක් සපිරෙයි.
චිත්රපට අධ්යක්ෂවරයකු ලෙස පමණක් නොව චිත්ර ශිල්පියකු, ගීත රචකයකු, සංගීත නිර්මාණකරුවකු, වෙළෙඳ දැන්වීම් නිර්මාණකරුවකු සහ රූපවාහිනී වැඩසටහන් නිෂ්පාදකවරයකු ලෙස ද විවිධ ක්ෂේත්රයන්හි සිය නිර්මාණශීලීත්වය ප්රකට කළ ඔහුගේ සිනමා ගමනට විශේෂ අනන්යතාවක් හිමිවන්නේ සැබෑ ජීවිත හා සැබෑ චරිත ඇසුරින් සිනමා නිර්මාණ බිහිකිරීමට දැක්වූ උනන්දුව හේතුවෙනි.
තේජා ඉද්දමල්ගොඩ සිනමා අධ්යක්ෂවරයකු ලෙස ප්රේක්ෂකයන් අතරට පැමිණියේ 2022 වසරේ තිරගත වූ ‘ආශාවරී’ චිත්රපටයෙනි.
එහෙත් ඔහුගේ සිනමා දැක්ම වඩාත් පුළුල්ව ප්රකාශයට පත්වූයේ ශ්රී ලාංකේය පොප් සංගීතයේ සුවිශේෂී සලකුණක් තැබූ ක්ලැරන්ස් විජේවර්ධනගේ ජීවිතය හා සංගීත ගමන්මඟ ඇසුරින් නිර්මාණය කළ ‘Clarence: Rhythm of the Guitar’ චිත්රපටය ඔස්සේය.
ක්ලැරන්ස්ගේ ජීවිත කතාව, සංගීත නිර්මාණ සහ ඔහුගේ පෞද්ගලික ජීවිතයේ විවිධ පැතිකඩ සිනමාවට ගෙන ඒමේ අරමුණින් තේජා මෙම දැවැන්ත නිර්මාණය ආරම්භ කළේය. එහෙත් රූගත කිරීම් සිදුවෙමින් පැවති කාලයේ ඇතිවූ අසනීප තත්ත්වයක් හේතුවෙන් ඔහුට චිත්රපටයේ වැඩකටයුතු අඛණ්ඩව කරගෙන යාමට නොහැකි විය.
ඔහු රෝගී වීමෙන් පසුව මෙන්ම අභාවයෙන් පසුව ද කැමරා අධ්යක්ෂ රුවන් කොස්තා සහ නිෂ්පාදක තුසිත ජයසේන ඇතුළු කණ්ඩායම චිත්රපටය අත් නොහැර ඉදිරියට ගෙන ගිය අතර 2025 ජුනි 27 වැනිදා එය මෙරට සිනමාහල්වල ප්රදර්ශනය ආරම්භ කළේය.
එමඟින් තේජා ඉද්දමල්ගොඩගේ සිනමා සිහිනයක් ඔහුගේ ජීවිතයෙන් සමුගැනීමෙන් පසුව හෝ ප්රේක්ෂකයන් අතරට ගෙන ඒමට හැකි විය.
ඔහුගේ නිර්මාණ ජීවිතය සිනමාවට පමණක් සීමා නොවීය. චිත්ර ශිල්පියකු ලෙස පුවත්පත් රැසකට සම්බන්ධව කටයුතු කළ ඔහු ‘මිරිවැඩි සඟලක්’, ‘මුතු වරුසාවක් වැහැලා’ වැනි චිත්රකතා නිර්මාණය කර තිබේ. ගීත රචකයකු සහ සංගීත නිර්මාණකරුවකු ලෙස ද ඔහුගේ දායකත්වය කැපී පෙනුණි. ශිහාන් මිහිරංග ගායනා කළ ‘මිහිරාවියේ සිහින කුමරී’ සහ අමිලා නදීශානි ගායනා කළ ‘ඔබ දන්නවාද දන්නේ නෑ’ වැනි ගීත ඒ අතර වේ.
එසේම Media Vision Advertising ආයතනයේ අධ්යක්ෂවරයකු ලෙස වෙළෙඳ දැන්වීම් ක්ෂේත්රයේ ද නිර්මාණ රැසකට දායක වූ ඔහු වෘත්තීය ජීවිතය තුළ බහුවිධ දක්ෂතා ප්රකට කළ කලාකරුවෙකි.
වර්තමානයේ ශ්රී ලාංකේය සිනමාව තුළ මිල්ටන් මල්ලවාරච්චි, ලතා වල්පොල, එච්.ආර්. ජෝතිපාල, රුක්මණී දේවි ඇතුළු ජනප්රිය කලාකරුවන්ගේ ජීවිත ඇසුරින් චරිතාපදාන චිත්රපට නිර්මාණය කිරීම පිළිබඳ වැඩි අවධානයක් යොමුවී තිබේ. එවැනි පසුබිමක තේජා ඉද්දමල්ගොඩ ක්ලැරන්ස්ගේ ජීවිතය සිනමාවට ගෙන ඒමට දැරූ උත්සාහය විශේෂයෙන් සිහිපත් කළ යුතුය.
ඔහු ආරම්භ කළ ‘Clarence: Rhythm of the Guitar’ නිර්මාණය අදටත් ඔහුගේ සිනමා දැක්ම සහ නිර්මාණශීලීත්වය සිහිපත් කරන සුවිශේෂී කලා නිර්මාණයකි.
2024 වසරේදී 61 වැනි වියේදී ජීවිතයෙන් සමුගත් තේජා ඉද්දමල්ගොඩ කලාකරුවාගේ දෙවැනි ගුණ සැමරුම යෙදෙන අද දිනයේ ඔහු සිනමාවට, සංගීතයට සහ වෙළෙඳ දැන්වීම් ක්ෂේත්රයට කළ නිර්මාණාත්මක දායකත්වය ගෞරවයෙන් සිහිපත් කරමු.

